O‘zbekiston Respublikasi Prezidenti huzuridagi Paxtachilik kengashining navbatdagi yig'ilishi bo‘lib o'tdi
Qishloq xo‘jaligi vaziri Ibrohim Abdurahmonov raisligida joriy yil ekin mavsumiga tayyorgarlik va urug‘lik chigitlarni tayyorlash jarayoni yuzasidan O‘zbekiston Respublikasi Prezidenti huzuridagi Paxtachilik kengashining navbatdagi yig'ilishi tashkil etildi. Unda O‘zbekiston Respublikasi Prezidenti huzuridagi Paxtachilik kengashi a’zolari, vazirlik departament va boshqarma boshliqlari, tizim tashkilotlari rahbarlari ishtirok etdi. Video-konferens-aloqa shaklida o‘tkazilgan yig‘ilishda paxta ekish mavsumi yaqinlashayotgani, bu jarayonga har bir mas’ul shay holatda turishi zarurligi ta’kidlandi. Shuningdek, Xitoy Xalq Respublikasidan xorijiy g‘o‘za urug‘liklarini olib kelish bo‘yicha amalga oshirilayotgan ishlar muhokama qilindi. Ushbu jarayonning mamlakat qishloq xo‘jaligi, xususan, paxtachilikdagi ahamiyatini qayd etib, davlat va nodavlat tashkilotlarining majburiyatlarini aniq belgilash lozimligini ta’kidladi. Xususan, qaysi guruh narx siyosati bilan shug‘ullanishi, qaysi biri esa paxta yetishtirish agrotexnologiyalarini nazorat qilishi lozimligi bo‘yicha takliflar bildirildi.
Bundan tashqari, g‘o‘za navlarining unuvchanligi, molekulyar-genetik tahlil — g‘o‘za urug‘liklarining irsiy xususiyatlarini o‘rganish usullari yuzasidan amalga oshirilayotgan ishlar ham ko‘rib chiqildi. Shuningdek, yig‘ilishda urug‘lik chigitlarni tayyorlashning joriy holati, mahalliy va xorijiy g‘o‘za navlarini hududlarga joylashtirish masalalari bo‘yicha ham fikr almashildi. Xorijiy g‘o‘za navlarini Xitoy agrotexnologiyasi asosida yetishtirishning afzalliklari, har bir konturda 20 foiz himoya belbog‘larini tashkil etish orqali hosildorlikni oshirish imkoniyatlari muhokama qilindi. Urug‘lik chigitni tanlashda e’tibor qaratilishi lozim bo‘lgan jihatlar haqida ham fikr almashildi.
Yig‘ilish yakunida chigit ekish mavsumi boshlanishi bilan sohaga mas’ul har bir xodim hududlarga borib, jarayonlarni bevosita kuzatishi zarurligi ta’kidlandi. Hududlar kesimida ishchi guruhlarning aniq vazifalari belgilab berildi.
